કાળક્રમે નાશવંત થઈ રહેલો સાહિત્યનો અમૂલ્ય વારસો ટકાવવા, જાળવવા અને લોકો સુધી પહોચાડવા માટે છેલ્લા બે દાયકાથી પ્રતિવર્ષ ભક્તકવિ પદ્મશ્રી દુલા ભાયા કાગની પુણ્યતિથી “કાગ ચોથ” (ફાગણ સુદ ચોથ) ના દિવસે એમની કર્મભુમિ કાગધામ (મજાદર) ખાતે વિવિધ કાર્યક્રમ યોજાય છે. જેમાં “કાગ ના ફળિયે કાગ ની વાતું“, લોક સાહિત્ય – ચારણી સાહિત્યમાં પ્રદાન બદલ પૂજ્ય મોરારીબાપુ પ્રેરિત “કાગ એવૉર્ડ” અર્પણવિધિ અને કચ્છ-કાઠિયાવાડ અને ગુજરાતના નામી-અનામી કલાકારો દ્વારા કાગવાણી પ્રસ્તુતિ થાય છે.

ગુજરાતી ડાયરાના લોકકલાકારો, ચારણી સાહિત્યનાં વિદ્વાનો અને સાહિત્ય ક્ષેત્રે સંશોધન માટે રાજસ્થાની વિદ્વાનને, આમ પ્રતિવર્ષ કુલ પાંચ એવૉર્ડ આપવામાં આવે છે. આ લોકસાહિત્યના મર્મીઓને પ્રોત્સાહનરૂપી રૂ.૫૧ હજારની ધનરાશી અને સ્મૃતીચિન્હ અર્પણ કરી, શાલઓઢાડી પૂજ્ય મોરારીબાપુ તથા કાગપરિવાર દ્વારા સન્માનિત કરવામાં આવે છે. એવોર્ડ અર્પણવિધિ બાદ પુજ્ય મોરારીબાપુ દ્વારા પ્રાસંગિક વક્તવ્ય આપવામાં આવે છે. સમગ્ર કાર્યક્રમનું સંકલન-સંચાલન  ચારણી સાહિત્ય અને લોક સાહિત્યના મર્મજ્ઞ ડો. બળવંત જાની સંભાળે છે.